ثقافة سوسن معالج: «ذنب شراز في رقبتنا يا توانسة»
إثر انتحار التلميذة شراز غلابي (12 سنة)، عبرت الفنانة سوسن معالج عن خيبتها من السياسة، وكتبت على صفحتها في الفايسبوك مايلي:
"شراز غلابي، 12 سنة و شهرين، روحت نهار السبت مالمبيت، قامت نهار الاثنين الصباح، عملت كوردة في اللوزة، بحذا الطابية قدّام الدّار، و انتحرت! شراز الكبيرة في أخواتها الأربعة، كانت تحبّ تكّمل قرايتها و تطلع طبيبة، كيفي انا حبيت نطلع قاضية و كيفك انت حبّيت تطلع رئيس و كيف الآلاف مالصغار تدمّرت أحلامهم بسبب الفقر و الميزيريا و الذل، السؤال الي مأرقني: منين جابت الشجاعة و القوّة باش تشنق روحها قدّام خواتها الصّغار؟ كيفاش وصلت في عمرها الصغير لها لحالة من اليأس؟ شنوّة الشيء الي وصل بوعيها الصغير للسّواد الأعظم هذا؟ شنوة الشي الي قسا على قلبها الصّغير وخلاها تختار الموت في الـ12 سنة؟ فاش خممت وهي تربط في الحبل؟
أسئلة ماهيش باش ترجّع شراز التلميذة المنتحرة، و لاهي باش ترجّع احلام الآلاف من الأطفال المنقطعين عن الدراسة، لنفس الأسباب، الي هوما الفقر و الذل والميزيريا ، فقط أشير لمرحلة اخرى بائسة تدخلها بلادنا بعد مرحلة الشباب يحرق في روحو، هانا وصلنا لمرحلة الطفولة تشنق في روحها، ولذا و مع فائق احتراماتي للبلاد هذي، شعبا وتاريخا، الي مازال يقلي ثورة وانتخابات وديمقراطية ومجتمع مدني وجمعيات واستحقاقات وحرية، نغشمو بكرسي في راسو! ذنب شراز في رقبتنا يا توانسة! «وإذا الموؤودة سألت بأي ذنب قتلت» تفوه علينا!"
